उनीहरूको रिहाईको माग यहाँका विद्रोहीले राखेका थिए । वार्तामा बस्नका लागि उनीहरू आवश्यक भएको भन्दै रिहाइको माग विद्रोहीले गरेपछि उनलाई रिहा गरिएको सरकारी पक्षको भनाई छ ।
रिहाइपछि विद्रोही कम्युनिष्ट पार्टीले उक्त निर्णयको स्वागत गरेको छ । साथै सो समूहले अब जेलमुक्त भएका नेताको सम्लग्नतामा नै विद्रोही पक्षको वार्ता समिति बनाइने पनि जानकारी दिएको छ ।
उक्त समूहबीच यसअघि भएको शान्ति सम्झौताको कार्यान्वयनका लागि हालै एक सम्झौता भएको थियो । गएको शनिबारबाट नै सो सम्झौता लागू भएको बताइएको छ ।
शान्ति स्थापनाका लागि यसअघि भएको सहमतिबमोजिम नै सो सम्झौता भएको बताइएको थियो । साथै शुक्रबारै प्राप्त अर्काे एक समाचारअनुसार अब सरकार र विद्रोही पक्षबीच अर्काे हप्ता शान्तिवार्ता सुरु हुने भएको छ ।
मलेसियाको राजधानी क्वालालम्पुरमा भएको द्विपक्षीय सहमतिबमोजिम शान्ति सम्झौता लागू भइसकेको छ भने अब शान्तिवार्ता नै सुरु हुनेछ– एक सरकारी अधिकारीले बताए ।
सो शान्ति सम्झौता करिब दुई वर्ष अघि भएको थियो । तर पनि यसको कार्यान्वयन हुन सकिरहेको थिएन ।
राष्ट्रपतिका शान्तिसम्बन्धी सल्लाहकार जियुज दुरेजाले अर्काे हप्ता वार्ता सुरु हुने जानकारी दिनुभएको हो । उहाँले शान्ति सम्झौताको कार्यान्वयन गरी शान्ति वार्ता अघि बढाइने गरी भएको सहमति फिलिपिन्सका लागि एक प्रमुख उपलब्धि भएको जानकरी दिनुभयो ।
मलेसियाको सहयोग र समन्वयमा सन् २०१४ मा उक्त विद्रोही समूह र सरकारबीच शान्ति वार्ता भएको थियो तर त्यसले सफलता भने प्राप्त गर्न सकेको थिएन ।
त्यस समयमा भएको सो सहमतिको कार्यान्वयनका लागि विद्रोही समूहबाटै अनाकानी भएको भनिएकोमा यस पटकको पहल अत्यन्तै सकारात्मक रहेको विद्रोहीले नै जनाएका छन् ।
शनिबारबाट सो सहमति भएपछि भने शान्ति वार्ताको सफलताको अपेक्षा गरिएको छ । शुक्रबार उक्त कम्युनिष्ट पार्टीका दुई जना वरिष्ठ नेतालाई रिहा गरिएपछि वातावरण थप शान्तिपूर्ण हुने अपेक्षा थपिएको छ ।
उक्त समूहका अध्यक्ष मुराद इब्राहिमले यसअघिको शान्ति सम्झौताको पालना गरेर अघि बढ्ने जानकारी दिए । उनले जनताको शान्तिको इच्छालाई मर्न नदिने प्रतिबद्धता पनि व्यक्त गरे ।
सरकारी वार्ता टोली र विद्रोहीपक्षबीच अर्काे हप्ता नर्वेको राजधानी ओस्लोमा वार्ता सुरु हुने जानकारी यसअघि नै सार्वजनिक गरिएको छ ।
