आयोगले तोकेभन्दा कम सङ्ख्यामा स्थानीय तह

प्रकासित मिति: ४ पुष २०७३, सोमबार १२:०६

काठमाडौँ, ४ पुस । स्थानीय तह पुनःसंरचना गर्न गठित ‘गाउँपालिका, नगरपालिका तथा विशेष संरक्षण वा स्वायत्त क्षेत्रको सङ्ख्या तथा सिमाना निर्धारण आयोग’ले आफूले तोकेभन्दा कम सङ्ख्याको स्थानीय तहको निर्धारण गर्ने भएको छ ।

जिल्लास्थित केही स्थानीय तह पुनःसंरचना प्राविधिक समितिले आयोगले तोकेभन्दा कम सङ्ख्यामा तह पुनःसंरचना गरेर पठाएपछि आयोगले आफूले तोकेको कम सङ्ख्याको स्थानीय तह निर्धारण गर्न थालेको हो ।

आयोगका सदस्य–सचिव डा हरि पौडेलले ७२० देखि ७३० को सङ्ख्यामा स्थानीय तह बन्ने बताउनुभयो । “जनसङ्ख्या, भूगोल, क्षेत्रफल विकास निर्माणको हिसाबमा ७४४ स्थानीय तहको बनाउने हाम्रो योजना रहेको थियो”, उहाँले भन्नुभयो– “तर जिल्लास्थित केही प्राविधिक समितिले हाम्रै मापदण्डका आधारमा कम तह निर्धारण गरेपछि हामीले तोकेभन्दा कम सङ्ख्या निर्धारण गर्न थालेका हौँ ।”

यसैगरी आयोगले बुधबार प्रधानमन्त्री पुष्पकमल दाहाललाई प्रतिवेदन बुझाउने तयारी गरेको छ ।

“सबै काम सकाएर हामी प्रतिवेदनको अन्तिम तयारीमा छौँ”, उहाँले भन्नुभयो–“बुधबारसम्ममा प्रधानमन्त्री दाहाललाई नक्साङ्कनसहितको प्रतिवेदन बुझाउने तयारीमा छौँ ।”

आयोगले प्रतिवेदन बुझाएपछि स्थानीय तहको निर्वाचनको बाटो खुल्नेछ

Bhansar Bivag
Argakhachi Cement